Hannås
.jpg)
Hannås er ein gard (gnr. 22) nord for Moisund i Hornnes i Evje og Hornnes kommune.
Hannås kan vere ein gamal gard. Det samansette topografiske naturnamnet peiker i den retning. Men garden er truleg ikkje mellom dei aller eldste i Evje og Hornnes. Etter gardsgrensene kan det sjå ut til at han er gått ut frå garden Kjetså i nord. Men namnet Voremyr som ein finn på garden kan au tyde på ein samanhang med garden Moi i sør, der Vorehei ligg.
Strøyman var husmannsplass under Hannås på 1600-talet, men vart skild frå og blei eigen gard i 1693.
Den første oppsittaren ein kjenner namnet til i lensrekneskapane er Tomas (Thommis) Hannås. Han er nemd frå 1610 til 1623. Etter 1650 kom det folk frå Grindheim i Vest-Agder til Hannås. Ola Torjusson Sveindal eigde 1 1/2 hud i Hannås. Han budde ikkje sjølv på garden, men sønene Leif Olson Sveindal-Hannås og Lars Olson Sveindal-Hannås budde der. Dei to delte garden mellom seg, i bruka Øvre Hannås og Nedre Hannås. I dag er det lastebileigaren og tømmerbilsjåføren Nils Thomas Hannaas som eig Nedre Hannås. På Øvre Hannås bur det ikkje folk.
Kjelder
- Olav O. Uleberg, Kultursoge for Evje og Hornnes, band I, utgjeve av Evje og Hornnes bygdeboknemd, s. 62-70
- Oddmund Mogstad, Gardsnamn i Hornnes, artikkel i Arnstein 2006, s. 31
- Olav O. Uleberg, Hornnes I, Gards- og ættesoge, utgjeve av Hornnes bygdesogenemd, 1969, s. 487-503