Postvegen (Evje)
Postvegen i Evje var den første køyrevegen mellom Evje og Vegusdal. Han avløyste Futevegen som «hovudveg» austover mot Nedenes og Arendal.
Nærare om veglina
Vegen tok til frå tunet i Evje prestegard. Vidare gjekk han om Oddestemmen til Odde. Frå tunet på Odde gjekk han opp Fotsporkleiva, ovafor tuna i Haugen og fram til Bjorvatn der Fylkesveg 42 går i dag. Vidare forbi vatnet gjekk han langs dagens vegline. Men frå Bjorland til Undelandsvegen gjekk Postvegen nord for dagens veg, kryssa aust for Geirustjørn, kom forbi øydegarden Håland og gjennom Hålandsdalen til Håtveitåna. Det gjekk bru over elva. Vidare heldt vegen seg nord for Hovlandsåna mellom Hovland og Skåre, skriv Oddmund Mogstad i Jol i Setesdal 2010. På Skåre gjekk han over den gamle brua og fram til Vegusdal. Truleg tenker Mogstad då på ein nyare versjon av vegen. På Kulturminnesok.no er det registrert at Futevegen (Postvegen) gjekk frå Tveit til Vegusdal-garden, altså på sørsida av åna, til 1886.
Postvegen Evje - Vegusdal må ikkje forvekslast med den første køyrevegen gjennom Setesdal, som kom gjennom Hornnes rundt 1840 og som har same namn.
Ny veg rundt 1880
Rundt 1880 blei Postvegen lagt om frå Bjorvatnet til Evje. Etter det har «Arendalsvegen» gått via Galteland til tettstaden Evje.
Kjelder
- Oddmund Mogstad, Historisk oversyn over vegar i Råbyggjelag, artikkel i Jol i Setesdal, 2010, side 6-9
- Kulturplan for Evje og Hornnes 2010-2020, vedteke av Evje og Hornnes kommunestyre 12. november 2010, side 42
- Om Postvegen Tveit - Vegusdal på Kulturminnesøk.no