Setesdalsgruppa
Setesdalsgruppa var ei av i alt fem grupper (område) i Setesdalsavsnittet, som etter re-organisering sommaren 1942 var eitt av avsnitta i Distrikt 18 (Aust- og Vest-Agder) i Milorg (den militære motstandsrøyrsla) i Norge under andre verdskrigen. Setesdalsgruppa omfatta Bykle, Valle, Hylestad og Bygland. Gruppa nedanfor dekka Evje, Hornnes, Iveland, Hægeland, Vegusdal og Mykland.
Disponent Knut O. Bø ved Setesdal Bilruter på Byglandsfjord fekk i oppgåve å organisere store delar av heimefronten i Setesdal. Samstundes var han ordonnanssjef med ansvar for å få sendt våpen, meldingar og anna dit det skulle. Frå hausten 1942 var kaptein Olaf G. Eriksen frå Kristiansand militærsjef for øvre del av Setesdal, medan løytnant Gunstein Greibrokk frå Bygland var militærsjef for nedre del. Gruppesjef var kaptein Nere Aakhus.
Sjefen for Kampgruppe 3/D18, major Arne Laudal, blei arrestert av tyskerane 7. desember 1942. Gestapo kom då over fleire namnelister. Dei fekk ei lett oppgåve med å finne fram til motstandsgruppene i Setesdal. Knut O. Bø blei arrestert 7. januar 1943, og avretta i Trandumskogen 9. mai 1944.
Kjelder
- Leonhard Jansen og Alfred Ryningen, Valle kommune VII, Kultursoge 1, utgjeve av Valle kommune, 1994, side 547–549
- Johan Christian Frøstrup og Bjørn Davidsen, Aust-Agder under okkupasjonen. Glimt fra krigsårene 1940-1945, 2. utgåve, Friluftsforlaget, 2018, side 296 flg.