Fennefoss

Fennefoss ein klar haustmorgon.

Foto: Geir Daasvatn

Fennefoss er ein gard (gnr. 6) i Hornnes i Evje og Hornnes kommune, på vestsida av Otra under Fennefossfjellet. Ein reknar med at garden er ein av dei eldste i Hornnes. Namnet kjem klarlegvis frå Fennefossen. Namneforskaren Olav Ryg meiner fossenamnet kjem av fen, våtlendt mark, som han meiner finst på begge sider av elva. Jørgen Moseid trur namnet kjem av den femte fossen, rekna frå Byglandsfjorden. Ei tredje forklaring, som den lokale namnekjennaren Oddmund Mogstad trur kan ha mykje for seg, er at namnet kjem av fånn, snøfonn (fleirtal fennirfors): Fossen ser ut som ei samling snøfenner når ein ser han nedanfrå.

Hans Nielsen Hauge kom til Fennefoss hausten 1803. Han stod bak utbygging av papirmølle, kornmølle, sagbruk og klesstampe ved Fennefossen; mest ein heil liten industri vart bygd opp der. Haugianaren og stortingsmannen Olav Torgrimson Fennefoss budde på Fennefoss. Ein stor bautastein til minne om han står i hagen framføre Evje og Hornnes museum, Fennefoss.

Bruk på Fennefoss

• Lunden
• Rønningen (Evje og Hornnes gnr. 6 bnr. 11)

Kjelder

• Olav O. Uleberg, Hornnes I, Gards- og ættesoge, utgjeven av Hornnes bygdesogenemd, 1969, s. 135 flg.
• Erik Kjebekk, Misjon og vekking i eit bygdesamfunn, hefte utgjeven av Evje og Hornnes Sogelag, 2002, s. 4 flg.
• Oddmund Mogstad, Gardsnamn i Hornnes, artikkel i Arnstein, årsskrift for Evje og Hornnes Sogelag, 2006, s. 29-33

Eksterne lenker

• Biletserie på Flickr frå Fennefoss-garden

Kart

Laster kart ...