Vestre Hodne

Vestre Hodne er ein gard i Evje og Hornnes kommune. Han ligg heilt sør i kommunen, langs vestbreidda av Otra sør for Moisund ned mot fylkesgrensa til Vest-Agder. Plasseringa av garden nede i dalbotnen, på den beste jorda langs Otra, og det naturgjevne namnet, tyder på at garden er svært gamal, truleg mellom dei eldste i Hornnes.

Namnet

Namnet blir i dag uttala «Honne» i Hornnes-dialekt. Men mest alle som har familienamn frå garden skriv Hodne. «Horne» er namnet også skrive og uttala. Opphavet til namnet er eit urnordisk ord som kan tyde både hjørne og horn. Her kan hjørne etter det kjennarane meiner passe svært godt. Den dyrka jorda ligg på hjørnet mellom Ærekilen og Honnekilen. Tvers over Otra ligg Austre Hodne (Austre Horne) i Iveland. Truleg har desse to gardane opprinneleg vore ein gard. Her er og dyrkajorda langstrakte hjørne.

Historie

Gardsgrensene for Hodne (Horne) i Iveland og Klepp i Evje går over i kvarandre. Det same er det for gardsgrensene mellom Vestre Hodne og Moi i Hornnes. Det skal ikkje vere funne gravhaugar på korkje Hodne-gardane eller Klepp. Men det er eit stort gravfelt på Moi. Oddmund Mogstad spør seg difor om gravfeltet på Moi kan vere felles gravfelt for heile området?

Det er funnen ein runestein ved Fossvik langsmed Fennefossen i Evje, med innskrifta (tyda) «Ånund på Horne eig meg». Truleg har steinen vore eit ankerfeste til ein båt. Dei lærde meiner steinen kan vere frå 1200-1300-talet.

Kjelder

• Oddmund Mogstad, Gardsnamn i Hornnes, Arnstein 2006, s. 29-30
• Olav O. Uleberg, Kultursoge for Evje og Hornnes, band I, utgjeve av Evje og Hornnes bygdeboknemd, 1990, s. 60 og s. 62-70