Olav Torgrimson Fennefoss

Olav Torgrimson Fennefoss
Født:	1777
Død:	1842 (alder 64–65)

Olav Torgrimson Fennefoss (fødd 1777 på Horverak, død 1842 (?) i Hornnes) var bonde, haugianar og stortingsrepresentant frå Fennefoss i Hornnes.

Minnestøtta over Olav T. Fennefoss som er reist på garden som seinare blei til Evje og Hornnes museum, Fennefoss.

Foto: Geir Daasvatn

Olav Torgrimson Fennefoss møtte Hans Nielsen Hauge på Senum då han vitja Otradalføret i 1803-1804. Fennefoss sa då opp lærarposten han hadde i Årdal, og flytta ut til Fennefoss for å arbeide på Mylla som Hauge ville etablere ved fossen. I 1811 døydde lensmann Ole O. Ramse i Hornnes. I 1813 gifta Fennefoss seg med enka Ingeborg. Med henne fekk han den tidlegare lensmannsgarden, det austre gardsbruket på Fennefoss. Heimen på Fennefoss vart midtpunktet for haugerørsla i Evje og Hornnes i mange år frametter.

Fennefoss var ein nevenyttig mann, han kunne utføre nær sagt kva slags arbeid det var, skriv Erik Kjebekk i ein artikkel i Arnstein i 2014. Han var også ein dyktig gardbrukar. Før han overtok garden på Fennefoss, skal han ha virka mykje som lekpredikant oppetter Setesdal.

I 1824 vart Fennefoss vald inn på Stortinget for Nedenes og Råbyggelagets amt. Han var den første stortingsmannen som blei vald frå Evje prestegjeld. Han sat på Stortinget 1824-1826.

Då Olav Torgrimson Fennefoss kom til Kristiania i 1824 var Hans Nielsen Hauge nettopp død. Fennefoss fylgde i gravferda.

Kjelder

• Erik Kjebekk, Kva har haugerørsla hatt å seie for Evje og Hornnes?, artikkel i Arnstein, årsskrift for Evje og Hornnes Sogelag, 2014, s. 47-54
• Olav O. Uleberg, Hornnes I, Gards- og ættesoge, utgjeve av Hornnes bygdesogenemd, 1969, s. 144
• Olav O. Uleberg og Olav Arne Kleveland, Kultursoge for Evje og Hornnes, band II, utgjeve av Evje og Hornnes bygdeboknemd, 2003, s. 261