Bøgruva

Bøgruva 16. juli 2018.

Foto: Geir Daasvatn

Bøgruva er ei gamal gruve der ein vann ut kopar. Gruva ligg vel ein halv kilometer (luftlinje) nordvest frå Bøgardane i Valle kommune. I 1984 vart det bygd ein skogsbilveg frå Åmli, det er langs denne ein går når ein går til Bøgruva i Postkassetrimmen i Valle.

Historie

På Bergverksmuseet på Kongsberg er det malm frå Bøgruva som er oppgitt å vere frå 1826. Gruvedrifta kom i gang i 1844 i regi av Det Sæthersdalske Kobberværk. Konsul G. F. Reinhardt i Kristiansand fekk mutingsbrev i 1844 og rett til all bergverksdrift på garden for seg og arvingane. Han fekk og rett til å overdrage rettane til andre. For dette skulle han betale 12 spesiedalar årleg. Denne summen skulle fordelast på grunneigarane etter skyld.

Ved folketeljinga i 1845 var det 34 mann i arbeid i gruva. Smeltehytta var i Åraksbø, så det var lang transport. Den skjedde om vinteren, men drifta av Bøgruva vart avslutta.

I 1863 vart drifta teken opp att. 10. november 1870 fekk konsul Seippel mutingsbrev på gruva. To år seinare overlet grunneigarane på Bø sine rettar i Bøgruva til kaptein Henriksen, same mannen som starta opp drifta i Flåt nikkelgruve på Evje. Gamle papir syner at i alle fall i 1875 var det folk som arbeidde i gruva. 1872–1909 låg gruva under Evje Nikkelverk IS. Frå 1920 låg ho under Evje Nikkelverk AS. Siste perioden gruva var i drift, var under 1. verdskrigen. I dei tre siste åra fram til drifta vart nedlagt 1. august 1918, arbeidde 12–13 mann i gruva.

Sjå også

• Straumsgruvene

Kjelder

• Leonhard B. Jansen og Alfred Ryningen: Valle kommune VII, Kultursoge 1 side 272
• Alfred Ryningen: Valle kommune III Gards- og ættesoge Valle side 107
• Sigmund Monen, Frå gamle gruvetradisjonar i Setesdal til arbeidarkultur i Evje, utgjeve av Evje og Hornnes kommune, 2016, side 57–62

Eksterne lenker

• Artikkel om Bø-gruva på Setesdalssida.no

Kart

Laster kart ...