Skråsjakta (Flåt)
Skråsjakta (Alfred Merrys sjakt) var ei slepesjakt i Gamlegruva i Flåt nikkelgruve i Flatebygd i Evje. Ho blei skoten ned i 1880, og gjekk frå dagen på skrå nedover i fjellet langs malmsona i 45 graders vinkel til 183 meters djup. Der starta seinare Nygruva.[1]
Ut til høgre side frå skråsjakta (mot vest) blei det lagt sidegangar (feltorter) i etasjar nedover med ca. 40 meters mellomrom.[2] Den venstre veggen i skråsjakta, på austsida, følger eit klart skille mellom malmgangen og gråberget. På den sida er det ingen tunnelar eller kjente nikkelgangar.[3]
Heistårnet oppe på overflata var 18 meter høgt. Eit svært hjul på toppen av tårnet blei drege av ei 1666 meter lang ståltrådline som gjekk til eit vasshjul under Oddefossen. Skråsynken hadde dobbeltspora jernbane, slik at ei vogn kunne gå opp medan ei gjekk ned.[4]
Referansar
- ↑ Sigmund Monen, Flåt nikkelgruver og bygda. Arbeidarhistorie, utgjeve av Evje og Hornnes kommune, 2016, side 46-47
- ↑ Olav O. Uleberg og Olav Arne Kleveland, Kultursoge for Evje og Hornnes, band II, utgjeve av Evje og Hornnes bygdeboknemd, 2003, side 46
- ↑ Flåt nikkelgruver og bygda. Arbeidarhistorie, side 129
- ↑ Evje og Hornnes kommune, plakat/oppslag i gruveområdet