Innistog (Longerak)
Innistog er ein gard i Bygland kommune (gnr. 54/1). Den ligg nede ved Byglandsfjorden midt i bygda Longerak. I gards- og ættesoge for Bygland skriv Reidar Bolling at truleg er det eldste bruket på Longerak, og det er uvisst når det blei kløyvd i mindre delar[1]. Garden hadde ei kvern øvst i Longerakselva, og to støylar – ein på Tveitå og ein i Lia.
Dei eldste kjende eigarane er Svenke Langerak som åtte garden i 1612, og sonen Olav Svenkeson i 1624. Garden har truleg hatt odelskrav, noko som blei tydeleg etter at Sigrid, dotter til Olav Gjermundson som åtte garden i 1723, vigde med Torgeir Olavson Fennefoss (no i Evje og Hornnes kommune). Torgeir Olavson avtala i 1735 eit odelsbyte mellom Fennefoss og Longerak med Olav Gunnarson Langerak, Olav Gunnulvson Langerak og Børulv Torkjelson Fennefoss.
Frå Innistog emigrerte Eivind Olavson (fødd 24. september 1864[2]) til Amerika 25. juli 1892[3], og Åsulv T. Langerak (fødd 6. oktober 1884[4]) i april 1903[5]. Fleire lærarar kjem og herfrå, Gunstein T. Langerak (fødd 22. januar 1891[6]) var rektor ved Hornnes Landsgymnas og broren Olav T. Langerak (fødd 21. oktober 1874[7]) var lærar på Bygland 1895–1941, han var utdanna ved Ullmans seminarium i Seljord. Mannen til Mari Olavsdotter Longerak (fødd 3. juni 1899[8]) var landbruksskulestyrar Olav Tverdal frå Rennebu (fødd 1898[9]).
Av Innistogætt er óg to av Bygland sine ordførarar i nyare tid, Magnhild Rygg og sonen Leiv.
Kjelder
- Bolling, Reidar: «Innistog. Br.nr. 1.» i Gards- og ættesoge Bygland, utg. 1952, s. 357–358.
- ↑ Bolling, Reidar: Gards- og ættesoge Bygland, utg. 1952, s. 352 ff
- ↑ Digitalarkivet: Aust-Agder fylke, Bygland, Ministerialbok nr. A 5 (1859-1873), Fødte og døpte 1864, side 43, nr. 58.
- ↑ Digitalarkivet: Årdal, Ministerialbok nr. A 1 (1885-1906), Utflyttede 1892-1895, side 122.
- ↑ Digitalarkivet: Aust-Agder fylke, Årdal, Klokkerbok nr. B 1 (1848-1895), Fødte og døpte 1884, side 69, nederst. I Gards- og ættesoge Bygland er fødeåret 1886.
- ↑ Digitalarkivet: Aust-Agder fylke, Årdal, Ministerialbok nr. A 1 (1885-1906), Utflyttede 1902-1907, side 124, nr. 2 i 1903.
- ↑ Digitalarkivet: Aust-Agder fylke, Årdal, Ministerialbok nr. A 1 (1885-1906), Fødte og døpte 1892, side 18, nr. 1.
- ↑ Digitalarkivet: Aust-Agder fylke, Årdal, Klokkerbok nr. B 1 (1848-1895), Fødte og døpte 1874, side 32, Olaf (I)
- ↑ Digitalarkivet: Aust-Agder fylke, Årdal, Ministerialbok nr. A 1 (1885-1906), Fødte og døpte 1899, side 29, nr. 5.
- ↑ Fødeåret er truleg ikkje rett i Gards- og ættesoge Bygland