Setesdalsgruppa
Setesdalsgruppa var ei av i alt fem grupper i Setesdalsavsnittet, som frå sommaren 1942 var eitt av avsnitta i Distrikt 18 (Aust- og Vest-Agder) i Milorg (den militære motstandsrøyrsla) i Norge under 2. verdskrigen. Setesdalsgruppa omfatta Bykle, Valle, Hylestad og Bygland. Gruppa nedanfor dekka Evje, Hornnes, Iveland, Hægeland, Vegusdal og Mykland.
Disponent Knut O. Bø ved Setesdal Bilruter på Byglandsfjord fekk i oppgåve å organisere store delar av heimefronten i Setesdal. Samstundes var han ordonnanssjef med ansvar for å få sendt våpen, meldingar og anna dit det skulle. Frå hausten 1942 var kaptein Olaf G. Eriksen frå Kristiansand ansvarleg for øvre del av Setesdal, medan løytnant Gunstein Greibrokk frå Bygland fekk ansvaret for nedre del.
Sjefen for Kampgruppe 3/D18, major Arne Laudal, blei arrestert av tyskerane 7. desember 1942. Gestapo kom då over fleire namnelister. Dei fekk ei lett oppgåve med å finne fram til motstandsgruppene i Setesdal. Knut O. Bø blei arrestert 7. januar 1943, og seinare avretta i Trandumskogen.
Kjelder
- Leonhard Jansen og Alfred Ryningen, Valle kommune VII, Kultursoge 1, utgjeve av Valle kommune, 1994, side 547–549
- Johan Christian Frøstrup og Bjørn Davidsen, Aust-Agder under okkupasjonen. Glimt fra krigsårene 1940-1945, 2. utgåve, Friluftsforlaget, 2018, side 296 flg.