Birkeland (Iveland gnr. 52)
Birkeland er ein gard (gnr. 52) nord i Iveland. I vest grensar garden til Kåbuland, i nord til Åmland i Evje og Hornnes, i aust til Gjerustad, Vestre Haukom og Katerås i Vegusdal. I sør ligg Eptevatn.
Historie
Garden blei truleg lagt øyde etter Svartedauden, og rydda oppatt seinare. Birkeland var benefisert Evje kyrkje. Ved kyrkjesalet i 1723 kjøpte sorenskrivar Lyth Ørum denne kyrkja. Birkeland blei med det vanleg leiglendingsgods.
Straks etter 1762 kan ein rekne med at garden blei sjølveigargods. På same tid blei garden delt i to bruk.
Evje Nikkelverk IS dreiv prøvedrift etter nikkel i skogen på Birkeland. Ei stund frå 1874 eigde også Nikkelverket bnr. 2 på Birkeland. Drifta varte utetter på 1870- og 1880-talet. Men køyringa av ertsen over heia til Evje blei for dyr. Prøvedrifta blei avslutta før ordinær drift kom i gang.
Kjelder
- Aslak Fjermedal, Iveland I - Gards- og ættesoge, 1955, side 777-786
- Kartverket.no