Ola Songesand
Ola Olsen Songesand (fødd 1779 i Stavanger, død 1858) var ein kremmar og eventyrar frå Lysefjorden i Rogaland. Han er truleg mest kjend som «Pilt-Ola».
Rundt 1823 var Ola Songesand i Straumsheia i Hylestad i Valle. Han visste om at Peder Lind hadde drive etter koparmalm i Straumsheia i tida mellom 1660 og 1680. Kanskje var han på leiting etter den vidgjetne Sølvgruva på Straume? Ola fann ikkje sølv, men heile haugane av utbroten koparmalm. Ved Stavsvatnet, mellom Amalie gruve og Kong Oscars gruve, bygde han ein liten smelteomn. Her klarte han med mykje strev å smelte ut ca. 150 kg med kopar. Koparen selde han seinare til konsul Reinhardt i Kristiansand. Konsul Reinhardt muta etter det mange skjerp i Straumsheia, og starta Det Sæthersdalske Kobberværk 20 år seinare.[1]
Kjelder og litteratur
Referansar
- ↑ Sigmund Monen, Frå gamle gruvetradisjonar i Setesdal til arbeidarkultur i Evje, utgjeve av Evje og Hornnes kommune, 2016, side 48-49