Albert Olsen

Albert Olsen

Byglandsfjord før 1908. Området midt i biletet og skogteigen heilt til venstre var det området som Albert Olsen fekk regulera til bustadområde. Strandgata ser ein til høgre i biletet.

Foto: Fotograf Køhn

Albert Olsen (fødd 11. april 1852 på Kjetså i Hornnes) var ein grossist i frå Kristiansand, og var ein del av eit firma, A. Olsen & søn. Ting tyder på at han var aktiv med oppkjøp av eigedom på Salbergmoen litt seinare enn Gunder Abusdal, i 1904. Han såg tidleg at det var bruk for mange hustufter på Byglandsfjord. Dette vart ein stasjonsby, om ein kan kalla bygda for det, som var i sterk vekst innan samferdsle, næringsliv og industri. Det kom opp husvære langs Setesdalsvegen og på båe sider av Strandgata mellom riksvegen og jarnbanestasjonen.

Albert Olsen kjøpte opp den flate furumoen sør for Strandgata med tanke på bustadtomter. Han hadde ein svoger som hadde drive med landmåling i Amerika, som så regulera og fekk opparbeidd 5 gater i dette området. Storleiken på tomtene var på rundt eit mål, og dei fekk kvart sitt nummer plent som i Kvadraturen i Kristiansand. Han ynskte også å kalla området for Albertstad, og fleire av tomtene som seinare vart kjøpt av Byglandsfjord Dampsag heitte Albertstad 1, Albertstad 2 osv. Bokverket Norges Bebyggelse nytta desse tomtenummera som husnamn i området.

Kjelder

• Fiskaa og Myckland: Norges Bebyggelse, Aust-Agder vestre del 1956, side 120-130.
• Setesdalsmuseets papirer etter Byglandsfjord Dampsag.
• Digitalarkivet
• Reidar Tveito etter diverse muntlige kjelder på Byglandsfjord.
• Albert Olsen i Digitalarkivet - Folketelling 1910
• Sigurd Abusdal, Or soga om Byglandsfjord, artikkel i Jol i Setesdal, 1987, s. 29-32