DB Dølen
DB Dølen var ein vedfyrt dampbåt som stod for gods- og persontrafikk på strekninga Gullsmedmoen - Bygland (Neset/Ose) i Byglandsfjorden frå 8. juni 1867 til 1957. Dølen var søsterskip til Bjoren, som seglar på Byglandsfjorden den dag i dag.
Skipet var opphaveleg 52 fot langt og 11 fot breitt. Maskinen hadde 8 hestekrefter. I 1899 blei det forlenga med 8 fot. Seinare blei Dølen bygd om til oljefyring, og forlenga med endå 10 fot. Første skipperen var Paul Hansen Borgen. Han var skipper i rundt 25 år.
Fram til 1930 var det Dampskibsaktieselskapet Bjoren og Dølen som stod bak drifta. I 1931 blei det selskapet oppløyst, og den organiserte dampbåttrafikken på Byglandsfjorden avvikla. Men Olav Frantson på Byglandsfjord kjøpte begge båtane, og heldt liv i post-, vare- og passasjertransport til gardane på vestsida av fjorden til 1957. Då blei Dølen hoggen opp, medan Bjoren gjekk i opplag.
Kjelder
- Johnny Haugen og Torgeir Moseid, 150 år sidan «Bjoren» og «Dølen» kom i bruk, artikkel i Setesdølen nr. 40, 2017, side 11
- Olav O. Uleberg, Kultursoge for Evje og Hornnes, band I, utgjeve av Evje og Hornnes bygdeboknemd, 1990, side 247-249