Aslak K. Austad

Aslak Knutson Austad (fødd 1912, død 2004) var elektromontør, gardbrukar og kulturberar i Bygland. Han budde størstedelen av livet på gardsbruket Ekron på Austad.

Arbeid

Aslak var utdanna som elektrikar. Han arbeidde i Oslo og under 2. verdskrigen nokre år i Kristiansand. Etter det reiste han heim til Setesdal. Han dreiv monteringsabeid på fjellgardane i Bykle. Seinare starta han eiga installasjonsverksemd med lokale på Ose. Han var med på Brokke-utbygginga på 1960-talet. Frå 1968 var han med på utbygginga ved Hovatn. Han var maskinist for Kristiansand Elektrisitetsverk 1970-1979. Arbeidet kom i tillegg til gardsarbeidet.

Kommunale verv

Aslak var med i Bygland kommunestyre i to periodar. Han var jordskiftemann og takstmann. Frå 1960 var han medlem i Austad forliksråd, og frå 1964 leiar. Sonen Knut blei sentare ordførar i Bygland.

Kultur- og fritidsinteresser

Aslak var i ungdomstida ein aktiv idrettsutøvar, både i hopp og langrenn. Han var formann i Austad Idrottslag i ei årrekke. Han var også aktiv kvedar og folkedansar. Han dansa mykje saman med Torbjørg Aamlid Paus. Dei gjekk heilt til topps i Landskappleiken. Aslak var leiar i Setesdal Spelemannslag 1948-1953 og 1965-1966.

Aslak gjorde også eit stort arbeid med å samle tradisjonsstoff, mellom anna etter Olav Eivindson Austad. Saman med brorer Olav K. Austad gav han ut boka Setesdals-stev i 1985. Han skreiv jubileumsskriftet då Austad kyrkje hadde 100-årsjubileum i 1980. Han var klokkar og ringde jola inn på Austad heilt frå 1940-talet til 1997.

Familie

Aslak var gift med Liv G. Austad (fødd Haugen) frå Haugen i Hylestad. Dei gifta seg i eit stort, tradisjonelt Setesdalsbryllaup 7. juli 1951. Dei fekk tre born, Brigde (f. 1952), Knut (f. 1953) og Tone (f. 1958).

Heider

• Målprisen 1986 i Bygland kommune

Kjelder

• Reidar Vollen, Bygland gard og ætt, bind III, utgjeve av Bygland kommune, 2005, side 339-343