Nils Heglands veg
Nils Heglands veg er namnet på hovudgata gjennom Evje sentrum frå krysset med Riksveg 9 sør for Infobygget og til møtet med Arendalsvegen i nord. Gata er oppkalt etter Nils Hegland, som døydde i tysk krigsfangenskap under andre verdskrigen. I eldre tider, før gata fekk sitt noverande namn, kalla dei ho gjerne "Kyllinggata". Det var ei gamal jente, "Doktor-Aase", som skulle ha funne på dette namnet då det var så mange småungar der.
I 2015 planlegg Evje og Hornnes kommune å gjere heile sentrumsgata om til miljøgate. Det skal kome fortau framom butikkane, på austsida av gata, og gang- og sykkelveg på vestsida. Evje Kiosk skal etter planen flyttast 50 meter nordover, til enden av parkeringsplassen der han står i dag. Det kjem fleire parkeringsplassar. Mot riksvegen skal det byggast ein mur, og overgangane der skal mjukast opp med buskar og tre. Det vil bli innkjøyring til parkeringsplassen vis-a-vis Intersport Evje og Evje og Hornnes Sparebank. Sjølve vegbanen vil bli pynta opp med stein. Gata vil få meir miljøpreg, med fleire planter, møteplassar og sittegrupper.
Kjelder
- Salve J. Bjorå, Frå det gamle Evje, artikkel i Jol i Setesdal, 1970, s. 30-34
- Vil bruke 11 mill. på miljøgate på Evje, artikkel i Setesdølen, 2. desember 2014, framsida og s. 7