Skisland

Skisland med Skislandsåsen bustadfelt. Otra i framgrunnen.

Otra forbi Skisland.

Foto: Geir Daasvatn

Skisland er ein gard og ei lita grend sør-vest i Iveland, på austsida av Otra, med Røyknes i Vennesla tvers over på andre sida av elva. Heile vestgrensa til garden er mot Otra, i en lengde på ca åtte kilometer. Mykje av denne strekninga er fossar og stryk frå naturens side. Men etter at Nomelandsdammen blei bygd først på 1920-talet, blei det stilleståande vatn ein kilometer eller så nordover frå dammen. I sør er Beiehølen dam bygd for å samle opp vatn til Steinsfoss kraftverk. Strekninga frå dammen og nordover til Røyknesfjorden har difor også nærpå fått same kotehøgde.

PÅ Skisland ligg Skislandsåsen bustadfelt med mange nye bustadar.

Historie

Lokalhistorikaren Aslak Fjermedal vil helst tru at garden går tilbake til folkevandringstida. Etter Svartedauden (ca 1349-1350) blei han liggande øyde. Ennå fram til midten av 1500-talet var det ikkje fastbuande på garden. Etter at garden blei tatt i bruk igjen var det fleire omstendelege odelssaker. Dei gav som resultat at det etter kvart mykje var Vennesla-ætter som blei buande på Skisland.

Fram til 1767 var det eitt bruk på Skisland. I dag er det tre hovudbruk.

I 1951 blei det sett opp to enkle hengebruer over Otra, slik at Skisland fekk eit slags vegsamband med Røyknes. I 1980 kom det nye bruer og god veg til Skisland. Etter den tid vaks garden fram til ei lita grend.

Kjelder

• Aslak Fjermedal, Iveland I - Gards- og ættesoge, utgjeve av Iveland bygdesogenemnd, 1955, side 239-252
• Salve Øina, Noke frå indre Agder, STAS forlag, 2014, side 55-62

Kart

Laster kart ...