Store Hallvorsvatnet
Store Hallvorsvatnet er eit vatn i Setesdal Vesthei. Det ligg om lag 870 meter over havet langt vest i Bygland kommune om lag 500 meter nord for Josephsbu.
Flyslepp
Natt til 12. april 1945 sleppte fire engelske fly 96 containarar med utstyr over vatnet. Det var den største flysleppoperasjonen på Sørlandet under krigen. Men sleppet gjekk heilt galt. Ein prøvde ut nye, avanserte fallskjermutløysarar, og dei verka ikkje etter planen. Dei aller fleste containarane vart knuste på isen. Nokre av dei gjekk gjennom isen. Containarane hadde våpen, ammunisjon og utstyr til ei gruppe motstandsfolk. Gruppa vart kalla Varg og Kasper Idland frå Figgjo var leiar. Major Jens Ropstad var også med på dette. Dei andre mottakarane skal ha vore: Thomas Omdal, Normann Fardal, Jens Torsland, Alf Hobbesland, Oluf Haraldstad, Einar Wiblemo, Anders Haddeland, Georg Gundersen, Kåre Rostøl, John Aksel Granberg, Olav T. Juvasstøl, Nils Juvasstøl, Severin T. Juvasstøl, Tobias H. Berg, Grunde T. Austegard, Olav Hamkoll, Einar J. Røysland, John Ljosland og Oscar Ljosland.
Gjennom åra har folk funne mykje av utstyret som vart sleppt ned. Mange har også dykka i vatnet. I perioden 6. august 2015 til 9. august 2015 var det ein tung leiteaksjon for å finne containarane og eventuelle krigsminne frå hendinga. Leiar for prosjektet var Ole Asbjørn Bergstøl. Musea i Agder og Rogaland støttar prosjektet, som det også skal lagast dokumentarfilm frå.
Kjelder
- Odd Inge Rønning Uleberg: Hva skjuler Store Hallvorsvatnet?. Artikkel i Fædrelandsvennen
- Johnny Haugen, Flyslipp-operasjonen på Agder 1940–45, artikkel i Agder Historielag sitt Årsskrift nr. 82, 2006, side 199–231
- Johan Christian Frøstrup og Bjørn Davidsen, Vest-Agder under okkupasjonen. Glimt fra krigsårene 1940–1945, Friluftsforlaget, 2021, side 418–425