Setesdal Husflid
Setesdal Husflid vart stifta i 1966 under namnet Setesdal Husflidssentral. Formålet var å selje husflidsvarer for lokale produsentar. Tidlegare heldt utsalet til i dei små hyttene ved Valle Motell, men frå 1996 har dei halde til i bygget mellom Valle kommunehus og Riksveg 9, som huser turistinformasjon mot nord og husflidsutsal mot sør.
I butikken finn ein ei rekke husflidsvarer, mellom anna Setesdalsbunaden med alt som høyrer til. Dei sel og Setesdalskofte og andre produkt handlaga av produsentar i Setesdal. Mellom anna har dei garn, souvenirar og gåveartiklar i tre, glas, vev, tekstil, smijern, keramikk og tinn. Ein del av bøkene til Setesdalsforlaget kan ein få kjøpt, og Bykle og Valle kunstlag har utstillingar om sommaren i dei roma som vert brukte til spitekafe om vinteren.
Styre
I 2010 var styret samansett slik:
- Olav T. Åkre, styreleiar
- Helga Birgit Bjørkeli, nestleiar
- Knut K. Homme, styremedlem
- Jorunn B. Brokke, styremedlem
- Malmfrid Nyborg Homme, styremedlem
- Birgit Annette Helle, styremedlem
- Jorunn Lund Harstad, varamedlem
- Anne Nomeland Helle, varamedlem
- Olav H. Rygnestad, varamedlem
Omsetning
Omsetninga auka frå 1 616 000 i 2008 til 1 944 000 i 2010. I 2015 var ho vel 2 millionar kroner. Inger Homme og Randi Gåserud Myrum delte på å vere dagleg leiar i Setesdal Husflidssentral, men Bodil Bygland overtok etter Randi Myrum i 2013. I 2021 var den økonomiske situasjonen blitt kritisk. Dei tilsette i verksemda arbeidde gratis i ein periode på åtte månader, og fekk drifta tilbake i normalt gjenge igjen.
Sjå også
Kjelder
- Brosjyren Setesdal Husflidssentral (utan årstal)
- Ole Birger Lien, Husflidsentralen i Valle 50 år!, artikkel i Setesdølen nr. 18, 2016, side 6
- Olav Åsen Haugsgjerd, Gratisarbeid fekk dei over kneika, artikkel i Setesdølen nr. 19, 2022, side 9