Olav G. Holen jr.
| Olav G. Holen jr. | ||
|---|---|---|
| ||
| Olav G. Holen jr. 1986. Foto: Kommunearkivet i Bykle/Lokalhistoriewiki
| ||
| Født: | 9. august 1917 | |
| Død: | 31. januar 2004 (86 år) | |
Olav G. Holen jr. (fødd 9. august 1917, død 31. januar 2004) budde i Bykle. Han etterlet seg familie og vener. Gravferda var frå Bykle gamle kyrkje fredag 6. februar 2004.
Oppvekst i Nordbygdi
Olav var fødd i Myri, eitt av bruka i Holen, i Nordbygdi. Han var yngst av seks søsken som levde opp. I ungdomstida var han heime og hjelpte til på garden. Han fekk Holsmoen av far sin, og hadde planar om å dyrke opp moen. Han sette også opp eit hus. Men nydyrkinga vart aldri noko av, og huset blei ikkje bygt ferdig.
I staden reiste Olav til Kristiansand. Han arbeidde i industrien, mellom anna på Falconbridge. Seinare gjorde han forskalingssnekring og var på anleggsarbeid.
Då han blei eldre, flytta Olav attende til Bykle. Han hadde eit lite bustadhus i Nedre Sarv. Der budde han saman med broren Tarald. Den siste tida av livet var han på Bygdeheimen.
Heiemann
Sambygdingen og namnebroren til Olav, Olav M. Holen, skriv i boka si om Nordbygdi at «[d]et er vel ingen i hans generasjon som var så lommekjend i heiene som han, heilt frå Haukeli i nord, til Ryfylke i vest og Sirdal i sør». Turane att og fram i heiene var ikkje bare for moro skuld, held Olav M. fram, dei var eit ledd i eit prosjekt Olav jr. hadde med å finne ut kvar dei gamle ferdavegane mellom Setesdal og grannebygdene i sør og vest gjekk.
Forfattar
Kjennskapen til dei gamle ferdavegane samla Olav i den første boka si, Ferdavegane i Bykleområdet og dei viktigaste vegane til og frå øvre Setesdal. Ho har ikkje årstal, men kom ut rundt 1968. Seinare (1986) blei boka noko utvida, og trykka opp på nytt, med tittelen Ferdavegane i Bykleområdet. Olav gav også ut to bøker om jakt, fiske og fangst, og ei bok med dikt og songar. Til slutt kom Frå toppen av Vrålstøylfjell.
Kulturmenneske
I den tida Olav budde i Kristiansand, var han aktiv i Setesdalslaget, Mållaget og i folkemusikkmiljøet. Han song og dansa, og fekk premiar på spelemannsstemner.
Kjelder
- Dødsannonse i Setesdølen nr. 9, 2004 side 2
- Olav M. Holen, Nordbygdi - slik ho var, 2. utgåve, 2013, side 185–190
- Om eigedomen Holen i Nedre Sarv og Olav G. Holen på Lokalhistoriewiki (tufta på artikkelen om same i Heimar og folk i Bykle