Falkefjell
Falkefjell er eit 978 meter høgt fjell mellom Skåmedalen, Skomefita og Ånebjør i Bygland vesthei. Dette er er ein del av eit heieområde som har namna Sunndalsheii og Sandviksfjellet. Området avgrensast i nord av Sunndalen, i sør av dalføret aust for Myhola og i nord-aust av Skåvatnet. Falkefjell er den høgaste toppen på vestsida av dalføret i tidlegare Bygland kyrkjesokn. Etter 1. juli 1997 vart Austad- Sandnes- og Bygland kyrkjesokn slegne saman til eitt.
Fleire toppar i same høgde
På kartutsnittet nedanfor er det merka av 4 toppar som alle har omlag same høgde. Merket lengst mot høgre/aust viser Falkefjell. Her har Statens Kartverk 3 målepunkt, 975,2, 975,3 og 977,5, og har oppgjeve 978 moh. som felles høgde for toppen.
Innanfor eit område 7-800 meter sør-vest for Falkefjell er det ytterlegare 3 omlag like høge toppar, 978, 975 og 981 moh. Desse ligg i det som kartet kallar Sunndalsheii og Myholheii. Dette er ein ope og lett terreng å vandre i.
Korleis koma hit
Det er ikkje merka turvegar i dette området, så her må ein nytta sunt bondevit, GPS eller kart for å finne fram. Frå riksveg 9, sør for Skomedal, går det ein skogsbilveg inn til Skåmedalen, men vegen er rasfarlig og berre grunneigarar kan køyre bil på denne. Men på eige ansvar kan ein gjerne sykla innover mot Skåmestøyl. Derifrå kan ein traktorveg fylgjast opp mot Lisle Skåvatn, og så finn ein eiga låm vestover opp fjellet mot Falkefjell.
Kjelde
- Reidar Tveito: Dei høgaste fjell og nutar langs båe sider av Otra, andre del, side 14-19, ISBN 978-82-998304-3-0.