Systog Dale
Systog Dale er garden til Margit Dale og Frode Verpe. Han ligg på Dale på vestsida av Otra, eit par kilometer nord for Valle sentrum. Garden er økogard. Her driv dei gardsbutikk, kunstgalleri og selskapslokale. Kjøt frå eigne lam er merkevaren til Systog Dale. Dei røyker lår, bøger, hals og sider i den gamle røykstoga, basstoge heiter det på garden. Dei sel og heimebaka brød, flatbraud og lefser, jordeple og syltetøy av alle slag. I 2013 utvikla Margit Dale Vallesnabben som produkt.
Nokre hundre meter nord for sjølve gardstunet ligg Kallefoss Hyttepark, som også er ein del av gardsdrifta.
Utviding
I 2017 investerte Margit 3 millionar kroner i ei utviding og opprusting av gardsverksemda. Det skulle mellom anna byggast større selskapslokale, større kjøkken, eigne rom for kursverksemd og nye toalett og garderobar. Innovasjon Norge støtta prosjektet med 400.000 kroner, og Valle kommune gav same sum i landbruksstønad.
Kjelder
- Johs. Bjørkeli: Tradisjonsmat i Valle: Rullar ut Vallesnabben. Artikkel i Fædrelandsvennen 4. januar 2014 side 46
- Ole Birger Lien, Utvidar Systog Dale for 3 mill., artikkel i Setesdølen nr. 23, 2017, side 4