Setesdal sogelag Årsmelding 2018

Setesdal sogelag Årsmelding 2018 var lagd ut på Facebooksida til Setesdal sogelag:

Årsmelding 2018:

Stor deltaking, særleg frå Suldal og Sørlandet, på Ulvetuva Fjellfestival i Bykle i august. I september var det sogevandring på husmannsplassar i Bygland med Arne Haugå som forteljar. To foredrag av Kjell Bitustøyl om tamreindrifta i Setesdal i samarbeid med Bygland folkebibliotek, Valle folkebibliotek og Folkeakademiet Valle. Men det største løftet var Årsskriftet Setesdal og setesdølar som kom ut for 4.gong med Andres Helle som redaktør og med stor innsats også frå Knut På Bø på Setesdalstrykk. No er Torgeir Moseid i gang med 5. årgangen, som skal kome ut til påske.

Planar for 2019:

I tillegg til årsskriftet planla siste styremøte 31. januar 2019 å ha sogevandring i Homme laurdag 25. mai 2019 kl. 12 (vasskulturområde med kvennhus, badstoge, gamle lopt og minne etter vass-sag og stampeplass), med Knut K. Homme og Knut O. Homme som omvisarar. To veker etter blir det samferdselssoge i brennpunktet, fyrst omvisning på Byglandsfjord og så veteranbuss til Fånefjødd, alt under kontroll av Torgeir Moseid.

Etter sommarferien er alle medlemer inviterte på busstur til Suldal av det driftige sogelaget der. Så er det planlagt sogevandring i Bykle-bygda laurdag 24. august 2019, deltaking på Kulturveka i Valle 25. okt.-3.nov. og samarbeid med Setesdalsmuséet om videoopptak av samtalar med eldre setesdølar. Eit par innandørs foredrag i mørketida hadde og vore ynskjeleg.

Alle velkomne på årsmøtet med synspunkt på alt dette og andre emne!

Beste helsing, styre og varamedlemer

Vidar Toreid, Knut K. Homme, Reidun Taksdal Bjørnarå, Niklos K. Besteland og Birgit Haugå Nordibø.

(Teksten er justert litt for å få internlenker.)