Lislevatn naturreservat
Lislevatn naturreservat er det eldste naturreservatet i Bykle kommune. Reservatet ligg vest for Riksveg 9 like nord for Hovden. Det blei freda 7. mai 1982. Reservatet er om lag 1 100 dekar stort, og ligg rundt 992 moh. Det omfattar både fjellvatnet Lislevatn og området rundt.
Formålet med fredinga er å ta vare på eit viktig våtmarksområde med tilhøyrande plantesamfunn, fugleliv og anna dyreliv som naturleg er knytta til området. Forvaltningsmyndigheit for området er verneområdestyret for Setesdal Vesthei Ryfylkeheiane landskapsvernområde.
Lislevatn er eit grunt og etter forholda næringsrikt fjellvatn omkransa av store myrområde, sumper og tjern. Innimellom er det små rabbar kledde med fjellbjørk, einer og vier. Floraen er rik, grunnen kalkhaldig og området er vurdert til å vere den beste innlandslokalitet for våtmarkstilknytta fugleartar i Aust-Agder. Det er eit viktig hekkeområde og trekkområde for ender og vadefuglar, og mange sjeldne artar er påviste.