Internettpunkta i Setesdal

Internettpunkta i Setesdal er eit tilbod til folk som reiser gjennom Setesdal om å kunne kople seg på gratis internett på utvalde stoppestader langs Riksveg 9. Til saman kan ein bruke internett i 60 timar ved denne ordninga, som ikkje er eit tilbod til fastbuande og som difor bare rekk 50 til 70 meter ut frå sendaren. Statens vegvesen har ikkje gjeve lov til å setje opp skilt for ordninga. Men på ein vegg like ved sendaren er det slått opp informasjon om tilbodet på ein plakat kalla Free hot spot. Plakaten er på norsk og engelsk og sendarane står på stader der det er lett å parkere.

Tenesta er levert av Nettkroken på Evje og ein kan laste ned sider med ein fart på inntil 1 megabit. Det er Destinasjon Hovden/Setesdal og kommunane i regionen som står for tilbodet, og dei kan få tilbakemelding om kva land brukarane av tenesta kjem frå og vil seinare kunne nytte denne kunnskapen i planlegging av tilbod til turistar.