Ridevegen Breive–Roaldkvam
Ridevegen Breive–Roaldkvam er ein gamal ferdaveg vestover for byklarane. Han gjekk frå Breive, gjennom Veringsdalen, over Nordmannsvadet, forbi Sveigen, over Meien, forbi Bleskestadmoen fram til Roaldkvam og vidare til Hylen i Suldal. Breive-folk brukte denne vegen når dei var på handletur til Suldal. Der kjøpte dei korn, mjøl, salt og andre handelsvarer. Men det er høgt og vêrhardt å gå over Meien vest for Veringsdalen. Over 20 menneske skal ha mista livet på denne strekninga på 1700- og 1800-talet. Folk frå Breive skal ha gått handelsturar over Meien heilt til 1890-åra. Seinare blei det opna turiststasjon i Breive, og bygt turisthytte på Bleskestadmoen. Då blei ridevegen over Meien merka som turistløype.
Kjelder
- Knut Gjerden, Bykle kultursoge, side 445
- Torfinn Normann Hageland, Gamle vegar og buplassar i Setesdal Vesthei, artikkel i Vandringer i Setesdal Vesthei, Friluftsforlaget, 2008, side 252–255