Bykle bygdesogenemnd
Bykle bygdesogemnd blei sett ned på 1990-talet. Ein kom til at det burde lagast eit større og oppdatert verk, i høve til Gards- og ættesoge for Bykle, med eit stutt utdrag av kultursoga av Knut Gjerden og Bjørgulv Holen som var gitt ut i 1966. Bjarne Tveiten vart vald til den første leiaren. Frå starten var også Tora Mosdøl, Gerd Fosse Hovden, Per Breivegen og Folke Nesland med i nemnda. Tveiten og Nesland gjekk etter ei tid ut av nemnda, og i staden kom Leonhard Jansen og Angerd Mosdøl inn. Jansen vart ny leiar. Per Breivegen gjekk bort sumaren 2005, året før bokverket kom ut. Han var ei av eldsjelene i arbeidet heilt fram til han døydde.
Aanund Olsnes frå Vinje vart tilsett som forfattar hausten 1998. Kommunens kulturkonsulent Astri Rysstad og vikaren hennar, Helene Fredly, var koordinatorar, medan nemnda og forfattaren tok seg av det faglege.
Arbeidet i nemnda gjekk i stort mon ut på å vere eit supplement og korrektiv til sogeskrivaren. I sum sat nemda att med eit inntrykk av at medlemene og forfattaren utfylte kvarandre på fruktbart vis. Men leiaren i nemnda, Leonhard Jansen, understrekar i føreordet til bind I at boka likevel heilt og fullt er sogeskrivar Aanund Olsnes sitt verk.
Kjelder
- Aanund Olsnes, Heimar og folk i Bykle, bind I, føreordet side 11-12