Haugetveit
Haugetveit er ein gard (gnr. 23) på heia aust for Åraksbø i Bygland. Gardstunet ligg ca. 525 moh. Lidtveit er næraste nabo, om lag ein kilometer mot vest. Frå bygda opp til garden er det drygt fire kilometer. Garden har eit areal på ca. 6 000 dekar.
Frå enden av bygdevegen til Haugetveit fortset Årdalsvegen ti kilometer austover til Årdalen.
Eigar av garden frå årsskiftet 2016/2017 er Olav Haugetveit (f. 1986). Han overtok då garden etter foreldra Knut Å. Haugetveit og Berit Haugetveit. Olav har i 2017 sett i verk eit stort arbeid med nydyrking av ca. 100 mål og bygging av nytt fjos til rundt sju millionar kroner. Han satsar på mjølkeproduksjon.
Historie
Ein gong langt tilbake i tid, truleg i mellomalderen, blei Haugetveit delt. Bonden på Søndre Sandnes fekk ein del som var kalla Nordre Haugetveit, i dag Ekron. Ekron har eit areal på 12 000 dekar, og høyrer i matrikkelen inn under Søndre Sandnes (gnr. 33).
Kjelder
- Reidar Vollen, Bygland gard og ætt, bind IV, utgjeve av Bygland kommune, 2006, side 519-552
- Artikkel om Olav Haugetveit og nysatsing på FVN.no 24. oktober 2016 (betalingsmur)