Bjørgulv Straume

Bjørgulv Straume
Bjørgulv Straume (til venstre) saman med Øystein Kikut
Født:	11. august 1938
Død:	6. april 2024 (85 år)

Munnharpa på plass i rundkøyringa på RV 9.

Siri Johannessen (31. oktober 2023)

Bjørgulv Straume (fødd 11. august 1938 i Hylestad, død 4. april 2024) var folkemusikar, kvedar og munnharpesmed. Han lærte kveding som barn av Gro Heddi Brokke og Tarjei Brokke. Seinare vart han inspirert av Torleiv H. Bjørgum til å spele munnharpe. Slåttar lærte han seg ved å høyre på opptak av munnharpe og hardingfele. I tillegg har han komponert eigne slåttar for munnharpe. Han har halde konsertar i inn- og utland og hatt mange kurs i munnharpespel.

I 2008 vart han vald til heidersmedlem i Norges Munnharpeforum, og på nettsida står denne grunngjevinga:

	Bjørgulv var ein av dei som bidrog til eit nytt gjennombrot for munnharpa i 80-åra. Kassetten "Luftslaget", den første utgjevinga med munnharpe som hovudinstrument, vekte stor interesse hos mange unge, og vart retningsgjevande for den nye trenden i munnharpespel i mange år framover. Utanom at han skapte ein ny spelestil, har Bjørgulv også halde mange munnharpekurs, både i Setesdal og rundt i landet. Han har gjeve ut CD’ane Frå ætt til ætt og Hrynhendt, den siste saman med pianisten Øystein Kikut. Han har og vore med på fleire andre produksjonar, som Frå Senegal til Setesdal saman med Kirsten Bråten Berg, Solo Cissokho og Kouame Sereba. Både her heime og i utlandet har han opparbeidd seg et stort namn som ein av dei beste og mest produktive munnharpesmedane våre. Bjørgulv har eit drivende godt dansespill, og han har vore med på å gjere munnharpa attraktiv som instrument til dans på kappleiker og i andre samanhengar. Han har vunne klassa for eldre folkemusikkinstrument på Landskappleiken to gonger, og dette førde til at munnharpa vart oppfatta som eit seriøst instrument.

Valle kommune sitt 1000-års monument er ei munnharpe, laga av Bjørgulv Bjørgum etter ei av munnharpene til Bjørgulv Straume som vart forstørra 50 gonger. I 2023 vart ho flutt frå den opphavelege plassen ved den vidaregåande skulen til rundkøyringa inn til Valle sentrum frå Riksveg 9. Harpa er oppført i Guiness Rekordbok.

Bjørgulv Straume var gift med Hanne Tangeraas Straume. Dei budde i Brokkevegen 75.

Prisar

• Vinnar av Setesdalskappleiken i munnharpespel og kveding 1988
• Vinnar av landskappleikane i 1990 og 1991

Heider

• Heidersmedlem i Norges Munnharpeforum (2008)
• Heidersmedlem i Setesdal Spelemannslag (2016)

Diskografi

• Hrynhent Møte mellom kunstmusikken og folkemusikken Saman med pianisten Øystein Kikut (2003)
• Frå ætt til ætt (1996)
• Luftslaget (1990 - kassett)

Med på

• Frå Senegal til Setesdal med Kirsten Bråten Berg
• Pilgrimen med Kirsten Bråten Berg, Svein Tindberg og Jan Erik Pettersen

Eksterne lenker

• Bjørgulv Straume hos nrk.no
• Bjørgulv Straume lagar munnharpe
• fanitullen i setesdal(munnharpe)
• Fanitullen - Bjørgulv Straume.wmv hos youtube
• Bjorgulv Straume Workshop

Kjelder og referansar

• Om munnharpa på nettsida til Bjørgulv Straume, archive.org, vitja 17. april 2024
• Ole Birger Lien, Bjørgulv Straume heidersmedlem, artikkel i Setesdølen nr. 101, 2016, side 3
• Dødsannonse i Setesdølen nr. 27, 2024, side 2
• Hallvard T. Bjørgum, Bjørgulv Straume er slokna, minneord i Setesdølen nr. 27, 2024, side 3

Referansar