Kristi Torjusdotter Pytten

Kristi Torjusdotter Pytten (fødd 1827, død 1915) var bondekone og husmann i Pytten, i Nedre Kviplassen, på Birkeland og Øvre Hegland i Bygland.

Kristi var gift med Tellef Salveson Kvinen. Han døydde i 1868. Kanske rett etter dette var Kristi nær ved å fryse ihjel. Ho blei funnen under ei gran på Hegland, mest livlaus, og med stakken heilt klaka. Ho blei tatt vare på og tina opp. Då våren kom sette fleire av Heglandsbøndene opp ei lita stove til henne. Det var i hagen litt aust for der Granheim Hotel seinare kom, på bnr. 3 sin grunn. Staden blei då kalla Kristihagen.

Kristi reiste frå Kristihagen rundt 1900. Ho arbeidde med spinning og nettbinding. Ho døydde av alderdom, nær 88 år gamal. Då var ho på Langeid.

Foreldra til Kristi var Torjus Jonson Pytten og Torbjørg Aslaksdotter Kvinen. Ho og Tellef hadde fem born saman.

Kjelder

• Reidar Vollen, Bygland gard og ætt, bind I, utgjeve av Bygland kommune, 2002, side 372, 374 og 380