Fennefoss kraftverk
Fennefoss kraftverk er eit planlagt elvekraftverk i Fennefossen i Otra i Evje og Hornnes kommune. Konsesjonshavar og utbyggar er Agder Energi Vannkraft. TT Anlegg fekk sommaren 2020 hovudoppdraget med å bygge kraftverket. Byggearbeida skal etter planen starte hausten 2020. Heile anlegget skal stå ferdig våren 2023.
Prosjektet omfattar bygging av inntaksdam på toppen av Fennefossen og bygging av kraftstasjon som bygg i dagen med tilhøyrande innlaups- og utlaupskanal på austsida av fossen. Kraftverket vil i gjennomsnitt kunne produsere om lag 53 GWh per år med det forslag til slepp av minstevassføring som er tilrådd av Norges vassdrags- og energidirektorat (NVE) i innstilling til Olje- og energidepartementet. Det svarar til straumforbruket til rundt 2 800 norske husstandar.
Kommunestyret i Evje og Hornnes gav i kommunestyremøte 28. august 2014 si høyringsuttale til departementet, i samband med NVE si positive innstilling til å gi konsesjon til bygging av kraftverket. I statsråd 11. desember 2015 gav regjeringa konsesjon til bygging av kraftverket.
Kjelder
- Norges vassdrags- og energidirektorat, Innstilling til Olje- og energidepartementet datert 4. juni 2014 i forbindelse med søknad fra Agder Energi Vannkraft AS om konsesjon til bygging av Fennefoss kraftverk i Evje og Hornnes kommune
- Pressemelding fra Olje- og energidepartementet om konsesjon til bygging av Fennefoss kraftverk
- Ole Birger Lien, Fennefoss-avklaring dreg ut, artikkel i Setesdølen nr. 16, 2016, side 11
- Fennefossutbygging i det blå, stykke i Setesdølen nr. 36, 2016, side 3
- Sigurd Haugsgjerd, TT Anlegg fekk Fennefoss-bygginga, artikkel i Setesdølen nr. 49, 2020, side 6
Eksterne lenker
Om konsesjonssøknaden på hjemmesiden til Evje og Hornnes kommune