Masi
.jpg)
Masi er ein liten fjelltopp nord-vest for Dåsnesmoen bustadfelt i Hornnes. Toppen er eit fint utsiktspunkt over bygda. Det går merka turløype til toppen, og han er eit populært turmål. Ein kan starte turen bak Hornnes gamleheim, der det er ein grei liten parkeringsplass, eller frå Varmedokka på Jortveit. På sjølve toppen er det postkasse med bok der alle som har vore på toppen kan skrive seg inn. Ønsker ein å ta ein litt lenger tur, er det merka løype vidare frå Masi til Fennefossfellet.
Turløypa er rydda og vert halden i stand av bygdefolk på dugnad. Mange har gjort ein stor dugnadsinnsats, men utan forkleining for nokon må ein kunne framheve John Gautestad. Bygdefolket har òg på dugnad bygd ein flott gapahuk heilt på kanten av toppen, der ein kan nyte naturen og utsikten i fred og ro.
Masi er ikkje eit godkjend namn på fjellet. Toppen seiast å vere kalla opp etter fornamna til to av dei ivrigaste turgåarane, Margrethe Gautestad og Signe Berge. Dei var med då det uoffisielle namnet kom i stand blant ein gjeng bygdefolk i 2004. Seinare har ingen kalla fjellet for noko anna enn Masi. Det har blitt tradisjon for å samlast på Masi kvar sundag i adventstida, til bålbrenning, sosialt samvær og song.