Sigbjørn Ravnåsen
| Sigbjørn Ravnåsen | ||
|---|---|---|
| Født: | 26. august 1941 | |
| Død: | 11. august 2016 (74 år) | |
Sigbjørn Ravnåsen (fødd 26. august 1941 i Herefoss, død 11. august 2016 i Kristiansand) var frå 2006 dagleg leiar for Haugeinstituttet i Kristiansand. Han hadde fireårig lærarskuleutdanning frå Kristiansand lærarskule i 1963 og hadde deretter teke tilleggsutdanning i kroppsøving og kristendomskunnskap. Frå 1964 til 1968 var han lærar i Flå, deretter var han to år i Indre Arna før han kom til Sauherad, der han var rektor frå 1970 til 1998. Frå 1989 til 1998 var han 1. vararepresentant frå Telemark for Kristelig Folkeparti på Stortinget. Han møtte for Solveig Sollie i perioden 16. oktober 1989 til 3. november 1990 og var då partiet sin «innpiskar» og medlem i Landbrukskomiteen.
Etter at han slutta som rektor i Sauherad, vart Sigbjørn Ravnåsen forskar i Telemarksforskning, Notodden, frå 1998 til 2005, dei første tre åra som leiar for eit forskningsprosjekt om Hans Nielsen Hauges etikk før han i 2005 så vart styreleiar og dagleg leiar av Haugeinstituttet. Han var aktiv i Kristelig Folkeparti på lokalt plan i Sauherad og fylkesleiar i Telemark. Frå 1986 til 1994 var han medlem av sentralstyret i partiet. Han var og leiar i Sund Normisjon og medlem av Sauherad sokneråd då han budde der.
22. april 2014 deltok han i Valle Radio i programserien Grunnloven 200 år og snakka om Hans Nielsen Hauge og grunnloven.
Han etterlet seg kona Signe Ravnåsen, barna Hilde, Jostein, Gina, Steffen og Målfrid svigerbarn, barnebarn, oldebarn og annan familie. Begravelsen var frå Voie kirke i Kristiansand onsdag 17. august 2016 klokka 10.30.[1]
Litteratur
- Ånd og hånd: Hans Nielsen Hauges etikk for ledelse og næringsliv, Luther Oslo 2002. Boka er også gitt ut i Estland.[2]
Referanser
- ↑ Dødsannonse i Fædrelandsvennen laurdag 13. august 2016 side 50
- ↑ Utgitt i Estland