Hovdestøylen Hotel & Lodge
Hovdestøylen Hotel & Lodge er eit hotell på Hovden. Det ligg om lag 600 meter sør for Hovden sentrum, like ved Otra. Skiløypene på Hovden går like utanfor hotellet, og i sesongen er det gratis buss til alpinbakken. Hotellet har 41 rom, 25 leilegheiter med 6 sengeplassar og 3 leilegheiter med 8 sengeplassar. Hotellet har gratis trådlaust internett. Hotellet vert drive av Hovden Resort.
Hausten 2021 skjedde det eit større opprustingsarbeid ved hotellet. Det blei bygt om til aktivitetshotell, med konferanseplass til 300 menneske, velværeavdeling, bowling og aktivitetsrom for heile familien. Alle roma blei også pussa opp. I renoveringsperioden frå 18. oktober 2021 til jul var hotellet stengt. Arbeida var kostnadsrekna til 30 millionar kroner.
Hovdestøylen er gnr. 2 bnr. 382 i Bykle. Heimelshavar til eigendomen (2023) er Hovdestøylen Utvikling AS.
Historie
Hovdestøylen opna i 1980. Carl-Otto Schiørn stod bak prosjektet, og eigde det nye hotellet. Saman med kona Tuls Schiørn dreiv han hotellet i 25 år. I 2005 blei det seld til nye eigarar. I 2009 blei hotellet seld på nytt, og driftsselskapet Hovden Resort overtok drifta.
Kjelder og eksterne lenker
- Heimesida til Hovdestøylen
- Ole Birger Lien, Satsar 30 mill. på Hovdestøylen, artikkel i Setesdølen nr. 73, 2021, side 4
- Kampen om skibakkane på Hovden, artikkel på Avtrykk.no skrive av Gaute Christian Molaug
- Artikkel om Hovdestøylen på Avtrykk.no, skrive av Gaute Christian Molaug
- Elektronisk grunnbok hos Statens Kartverk