Torbjørg Aamlid Paus
Torbjørg Aamlid Paus (fødd 1923 i Valle, død 2001 i Valle) var ein norsk kvedar som sette djupe spor etter seg. Ho var den fyrste til å vinne tevling i kveding på Landskappleiken, det skjedde på Notodden i 1958, og ho vann tre gonger på rad. Sidan kom ho attende og vann att i 1975. Fyrste gongen ho deltok på Landskappleiken var i 1951, då saman med Aslak Austad. Siste gongen var i 1993.
Ho gjekk på Hornnes landsgymnas under krigen og fekk deretter lærarvikariat i Østfold. Her vart ho hausten 1944 mistenkt for å ha gjeve hjelp til heimefrontfolk som tok seg over svenskegrensa ved Halden. Ho vart arrestert og sendt til Grini. Etter krigen heldt ho fram som lærarvikar eit par år før ho tok sekretærutdanning og fekk stilling i Agder Skogeigarlag i Kristiansand. Der møtte ho og mannen sin, Finn Paus, og dei busette seg i Kristiansand.
Torbjørg Aamlid Paus var aktiv i folkemusikkmiljøet der. Ho lika å syngje, og Sigurd Berg spela ofte fele når ho kvad. Ho framførte og eigne dikt, av dei laga ho i 1979 syngjespelet «Vestheiin» med musikk av Rolf Nyhus. Det hadde fyrste framsyninga på landskappleiken i Kristiansand i 1980.
Ho hadde mange elevar, og ho var og leiar i leikarring. Ho var styremedlem i Landslaget for Spelemenn frå 1972 til 1976. Der var ho kasserar og rekneskapsførar for Spelemannsbladet. Seinare vart ho æresmedlem i laget. Ho var og æresmedlem i Kristiansand spelemannslag og Setesdal spelemannslag.
Prisar
- Kongens Fortenstmedalje i gull
- Valle kommune sin kulturpris
- Siliusprisen frå Fædrelandsvennen.
Kjelder
- Torbjørg Aamlid Paus hos www.folkedans.com
- Olav Mosdøl: Torbjørg Aamlid Paus i Jol i Setesdal 2001