Urdvikheii
Urdvikheii er eit fjell (615 moh.) aust for Urdviki ved Storstraumen mellom Bygland og Åraksbø. Berget av kvartsitt har tydelege, nesten loddrette oppsprekte lag, omtrent som skivene i eit brød. Då isen smelta for kanskje 10 000 år sidan, og «støtten» frå isbreen som låg i dalføret forsvann, kollapsa dei ytterste skivene og enda som kjempestore steinblokker i ei stor ur under fjellet. Enorme blokker ligg hulter til bulter nederst i ura og gjer det vanskeleg å ta seg fram. Det går likevel ein sti gjennom ura til eit klatrefelt i bratthenget lenger oppe i fjellsida.
Riksveg 9 gjennom Setesdal passerer under Urdvikheii, og har vore mykje utsatt for ras på denne strekninga. I 2011 blei ein stor fjellhamar i Urdvikheii sprengd bort for å redusere rasfaren. Det er også bygd ein svær rasvoll langs riksvegen nede ved fjorden.
Sjå også
Kjelder
- Johan Christian Frøstrup (red.), Vandinger i Setesdal Austhei, Friluftsforlaget, 2014, s. 202