Rygnestadtunet
Rygnestadtunet er eit særmerkt gardstun på Rygnestad i Valle kommune, om lag ei mil nord for Valle sentrum. Tunet er autentisk, bygningane er bygde der dei står og er ikkje flytt til tunet. Einaste unntaket er kvernhuset. Den eldste delen av stogehuset er frå tida før Svartedauden, medan dei nyaste bygningane er sett opp på 1900-talet. Garden har vore museum sidan 1940, då Setesdalsmuseet overtok anlegget, der det ikkje hadde budd folk sidan 1919. Stogehus og dei to lopta vart freda i 1923.
Rygnestadtunet er garden etter segnhelten Vonde-Åsmund Rygnestad (ca. 1540 - ca. 1596). Vonde-Åsmund var ein av bondeførarane i Valle i dei urolege tiåra etter reformasjonen. Han skal ha vore leigesoldat i Europa, og i det spesielle loftet på garden heng nokre av dei sjeldne måleria og gjenstandane som av den grunn skal ha kome til Rygnestad.
Kjelder
- Setesdalsmuseet - Valle, brosjyre, 2015