Brua over Oddebekken

Dette er ei lita bru på riksveg 9, så lita at ein snaut legg merke til den, sett frå bilen. Men om ein fylgjer den nye sykkel og gangvegen som går under riksvegen ved Evje skule, så vert den flotte steinkvelvbrua godt synleg.

Eigentleg går riksvegen på to parallelle bruer, der den vestre delen opphaveleg var ei bru for Setesdalsbanen. Denne vart sjølvsagt for smal då kompensasjonsvegen for banen skulle fylgje det tidlegare jarnbanesporet framom Evje i 1967. Ein ny del i betong vart støypt inntil den gamle brua, og dette har fungert bra sidan. Etter at gangvegen her fekk si eiga bru over Oddebekken i 2012, kom den gamle steinbrua til synes att.