Sigurd Eivindson Sordal
| Sigurd Eivindson Sordal | ||
|---|---|---|
| Født: | 1770 | |
| Død: | 6. november 1798 (alder 27–28) | |
Sigurd Eivindson Sordal (fødd 1770, død 6. november 1798) var landvernsoldat. Vinteren 1798 var han heime hos familien som var bruksfolk på bnr. 1 på Søndre Sordal i Bygland. 4. februar 1798 drap han Rannei Olsdotter Hegland (f. 1770, d. 1798) med kniv. Rannei var då gravid.
Sigurd blei stilt for krigsrett. Han blei dømd til døden ved halshogging 15. august 1798. Domen i krigsretten blei stadfesta av kong Christian 7 5. oktober 1798. 6. november 1798 blei han avretta på Sordal.
I folketradisjonen heiter det at Sigurd blei avretta på Steglefloti, ei slette i skogen på vestsida av fylkesvegen, sør på Sordal. Bygdebokforfattar Reidar Vollen er ikkje avvisande til det.[1] Historikar Leonhard Jansen held det også for mykje truleg at avrettinga skjedde på Steglefloti. «Men det finst inga skriftleg, samtidig skildring av rettarstaden. Det er altså framleis usemje om nøyaktig kvar avrettinga gjekk føre seg», skriv Vilborg Stubseid Hovet.[2]
Referansar
- ↑ Reidar Vollen, Bygland gard og ætt, bind II, utgeve av Bygland kommune, 2003, side 47
- ↑ Vilborg Stubseid Hovet, Ein historisk stad. Liv og lagnad i Austad sokn, utgjeve av Setesdalsmuseet, 2024, side 205