Kyrelitjønn
Kyrelitjønn er eit vatn ca. 853 moh. i Valle kommune. Det ligg om lag ein kilometer nordvest for Sundet i Store Bjørnevatn. Namneforma vart godkjent i 2000, då vart fleire andre skriveformer ikkje godkjende: Kyrelitjørni, Kyrlitjønn og Kyrlitjørn.[1]
Vatnet har blitt kalka opp gjennom åra. I 2013 søkte Kyrelitjønn fiskelag om tre tonn kalkmjøl og fekk innvilga dette. Kalkinga har ført til at auren har kome tilbake til vatnet, men vatnet er blitt overbefolka. Difor hadde Olav Rygnestad sommarjobb i 2013 med å fiske opp småfisk med garn saman med faren Hallvard O. Rygnestad. Gunhild Rygnestad og kusina Maria Heyerdal var med i registreringsarbeidet. Opp til 160 aurar var i garnet etter ei natts fiske. Målet er å fiske ut så mykje at den fisken som vert att, kan bli større og gje grunnlag for stangfiske i Kyrelitjønn att.[2]
I skråninga nord for Kyrelitjønn ligg Kyrelitjønn naturreservat, som vart oppretta i 1986.
Referansar
- ↑ Kyrelitjønn hos yr.no
- ↑ Johs. Bjørkeli: Sommerjobb - garnfiske i fjellheimen. Artikkel i Fædrelandsvennen Innsikt 27. juli 2013 side 30 og 31