Johanne Skoe

Johanne Skoe (f. Greibrokk, ca. 1927, død 2020) var gymnastikklærar i Bø og gardkone i Lunde i Telemark. Ho var fødd og oppvaksen i Grendi i Bygland.

I ungdomen var Johanne ein framifrå friidrettsutøvar. Ho var den første noregsmeistaren i friidrett frå Setesdal. Totalt blei ho noregsmeistar ti gonger: seks i lengde utan tilløp, tre i høgdehopp og eitt i kule. Ho var ein allsidig idrettsutøvar, og vann også tre sølvmedaljar og to bronsemedaljar i trekamp (100 meter, diskoskast og høgdehopp). Ho fekk også ein sølvmedalje og to bronsemedaljar i femkamp (60 meter hekk, høgdehopp, kulestøyt, lengdehopp og 800 meter). Alt i alt vann ho 31 medaljar i noregsmeisterskap. Ho deltok også i fleire landskampar for Norge.

Johanne representerte først Grendi IL, men melde seg inn i Oslo IL etter at ho flytta frå heimbygda.

Kjelder

• Nils Martinius Justvik, Johanne Greibrokk frå Grendi: Første noregsmeister frå Setesdalen, artikkel i Jol i Setesdal 2022, side 4–7
• [https://www.lundekirken.no/_service/207131/download/id/521313/name/Lunde+Kyrkjeblad+nr.+3-2020+151x213mm.pdf Lunde kyrkjeblad nr. 3, 2020