Bjørgulv D. Bjørnaraa

Bjørgulv D. Bjørnaraa
Født:	10. mai 1878
Død:	1942 (alder 63–64)

Bjørgulv D. Bjørnaraa (fødd 1878 i Valle, død 1942 i Minnesota) var lærar og bonde, skribent, folketalar og organisasjonsmann i USA. Han hadde norsk lærareksamen frå 1898, og var utdanna ved Viggo Ullmanns seminar i Seljord. Der hadde han då broren, Torgeir Drengson Bjørnaraa, som ein av lærarane sine. Han gifta seg i 1900 med Ingebjørg (1979-1966) og reiste året etter til Amerika og busette seg i Minnesota.

Lærar og bonde

I Amerika arbeidde han som lærar i Starbuck, Pennington County, nær byen Glenwood. Men i 1912 kjøpte han eit homestead i Langeid Township, Pope County, nær byen Thief River Falls. Han heldt fram som lærar og bonde, sjølv om det nok var kona som måtte drive garden, for Bjørgulv vart meir og meir engasjert som organisasjonsmann, skribent og folketalar.

Skribent

Han var byskrivar (town clerk) og protokollførar for skulestyret. Han skreiv også mykje i lokalavisene (t. d. Starbuck Times, Glenwood Herald, Thief River Falls Times). Han skreiv både dikt og artiklar og vi finn stoff av han i dei norskamerikanske publikasjonane Nordmanden og Decorah Posten. I tillegg tok han initiativet til og var formann i ei rekkje ungdomslag, skyttarlag og idrottslag.

Organisasjonsmann

Medan familien budde i Starbuck, tok han i 1909 initiativet til å skipe Setesdalslaget i Amerika. Han var formann i laget i 32 år. Dette laget finst framleis, og har hatt samanhengande drift sidan starten.

Etter at han hadde flytta til Langeid County, var han i 1916 med og skipa «Norwegian-American Bygdelagenes Fellesraad», ein samskipnad for alle dei omlag 50 norske bygdelaga i Amerika. Han sat i styret der i alle år seinare og då han døydde, var han formann i laget, som har halde fram i alle år seinare. Gjennom åra vitja han alle dei 50 laga med talar, diktlesing og felespel.

Bjørgulv D. Bjørnaraa var også ein av grunnleggjarane av Sons of Norway i Minnesota. Han var mykje etterspurd som talar ved stemner og samkomer av alle slag.

I 1914 stod han for skipinga av The Hardanger Violinist Association of America. Laget gjekk i oppløysning då han døydde, men vart teke opp att tidleg på 1980-talet. Sjølv var han spelemann og kappleiksdommar og var ivrig oppteken av at norsk kultur skulle dyrkast og takast vare på i Amerika.

Han meinte og at emigrantane måtte også halde kontakt med gamlelandet. I 1930 leia han ei gruppe på nærare 1000 norskamerikanarar på reise til Norge i samband med 900-årsjubileet for slaget på Stiklestad. Han var også på talarferd i i Norge det året og talte på 35 stader sommaren 1930.

Familie

Opplysningane om familien i USA fekk Heimar og folk i Bykle frå Bob Bjørnaraa (1938) i Apple Valley, Minnesota. Han er Bjørgulv Bjørnaraa sin soneson, far hans var Torvald Bjørnaraa.

Med Gyro O. Bø

• Birgit, fødd 1900

Med kona Ingebjørg

• Tore (1901-1902)
• Dreng (1903-1987)
• Olav (1905- 1960)
• Selma (1907-?)
• Torvald (1909-1960)
• Einar (1911-1972)
• Tora (1913-1936)
• Borghild (1916-1987)
• Sigurd (1919-2005)
• Anna (1921-1935)
• Solveig (1923- )

Kjelde

• Informasjon frå artikkel om Der heime (Bykle gnr. 18/2) hos lokalhistoriewiki.no si side om Heimar og folk i Bykle