Valle, ja Valle

Valle, ja Valle er ein song om Valle skriven av Eivind S. Berg og dottera Anne Berg Helle. Songen stod på trykk i Vegleiaren nr. 6, 1956. Melodien er ein av melodiene til «Astrid, mi Astrid».

1.

Valle, ja Valle, kor fagert det klinger

fagert du ligg mellom traustbygde fjell

Nede i dalbotnen Otra seg svingar

dunar so høglydt i draumstille kveld

Klunkar og spelar so fagert ein song

tenner i hjarta ein æveleg trong -

2.

Sjå utfor stupet kor villskleg ho bråkar

skumsprøyten gøyser so isande kald

Ufser og steinar i laupet du råkar

ingen kan stogga og stengja ditt fall

Trollstemt og fagert, - ja vill harmoni

når Halland han spelar sin mollmelodi

3.

I Valle ligg staden der mor sat ved vogga

der eg låg velstelt og smilte og lo

Ho turka tåra når auga var dogga

best ho av alle i alt meg forsto

Ja, det var hugnad hjå far og hjå mor

ein fagrare stad finn eg aldri på jord

4.

Minni om Valle i hjarta eg gøymer

kvar helst i verdi eg reiser og er

Det aldri må henda at heimen eg gløymer

ingen stad er det so fagert som der

Difor er dette min lengt og mi trå

tilbake, tilbake og heimen min sjå

Innspelingar

Songen er og kjend som «Vallesongen» og «Vallevisa» og er spela inn av mellom anna

• Eivind S. Berg, song, på kassetten Kom regn av det høie (1988)
• Bjørgulv Straume, munnharpe, på albumet Frå ætt til ætt (1996/2007)

1. Hulda Johansen og Elias Akselsen, song, som «Vallesongen», på albumet Barn av den bortglemte rase (2000)

• Vigdis Larsen, song, som «Vallevisa», på albumet Viser på vandring vol. 1 – Songs of the Romany people in Norway (2002)

Kjelde

• Tekst og opplysningar gjeve av Harald B. Knutsen i Agder Folkemusikkarkiv 25. januar 2012