Bykil
Bykil (uttale Bykjil, tidlegare også skrive Bykhyl) er eit vatn i Bykle kommune. Det ligg eit stykke sør for Bykle kyrkjebygd som ei stillvetne i Otra, der Setesdal er på sitt aller smalaste, og får også vatn frå Floslivatnet. På austsida av Bykil ligg Byklestigen.
På 1960-talet ville kraftutbyggarane bygge ein svær betongdam akkurat her, og lage eit kjempemagasin tvers over dalføret. Planane vart stansa av regjeringa i 1969. Bykil er i staden regulert med den lille Dam Bykil. Ved oppstarten av Brokke kraftverk først på 1960-talet var inntaket i Bykil. Midt på 1970-talet blei inntaket flytta frå Bykil til Botsvatn. Den eksisterande driftstunnelen til Brokke blei kopla saman med ein ny tunnel frå Botsvatn til Bykil med nytt inntaksarrangement i Botsvatn.
Namnet
Sentrum i Bykle er garden Byklum. Frå dette gardsnamnet har så namnet på kyrkjesoknet og bygda kome. Men gardsnamnet er truleg ikkje det primære i denne rekka. Byrjinga må vere stadnamnet Bykil. Tarald Nomeland meiner Bykil kjem av det gamalnorske ordet bygil; altså noko som er bøygt, ein bøyg eller bug. Det høver på Bykilen, han ligg noko bugen midt i dalen.
Kjelder
- Lokalhistoriewiki.no
- Johs. Bjørkeli og Gro Seland, Reddet bygda fra neddemming, artikkel i Fædrelandsvennens lørdagsmagasin God Helg 24. oktober 2014
- Knut Gjerden, Bykle kultursoge, utgjeve av Bykle kommune, 1993, side 364
- Otteraaens Brugseierforening, Revisjonsdokument – Reguleringskonsesjoner i Otravassdraget, 2. juli 2021, side 49