Vårehei
Vårehei er eit heieområde i søraustre delen av Hornnes. Rundt heia ligg gardane Vestre Hodne, Haugland, Sutestad, Tønnesland og Moi. På nokre kart er namnet Våråhei. Namnet har nok samanheng med det norrøne ordet võrđr som tyder vern. Namnet er typisk for stader der det har vore vete i gammal tid.
I sør er Vårehei avgrensa av Lindåna som kjem frå Vålevatn og som renn gjennom Skranevatn og ut i Ærekilen. Langs Lindåna er det sterke merke etter mange gamle vegar. Den eldste er Dalemannsvegen. Kjørevegen frå rundt 1840 fylgjer den gamle vegen forbi Hodnekilen, men går på bru over Lindåna og rundt Ærekilen. Mellom Slettefet og Hornekilen er det ein veg som vart bygd under krigen, men aldri teken i bruk.
Sundag 26. mai 2013 hadde Evje og Hornnes sogelag tur i området.
Kjelder
- Oddmund Mogstad: Gardane rundt Vårehei. Artikkel i Setesdølen nr. 39, 2013 side 3