Albertstad

Byglandsfjord i 1924. Det åpne området midt i biletet, med gater og berre få hus er det som skulle heitt Albertstad. Nærast ser ein Setesdalsvegen, og i bakgrunnen Byglandsfjord Dampsag, Stasjonsskogen med jarnbanestasjonen.

Foto: Ukjend fotograf

Albertstad er eit namn på ein større del av Byglandsfjord, men eit namn som aldri kom i vanleg bruk. Salbergmoen heitte den flate furumoen der gamlebygda på Byglandsfjord ligg. Det gjekk ein kjerreveg lengst nord i området mellom Setesdalsvegen og Senumsundet. Straks etter at Stortinget vedtok å byggja jarnbane opp til Byglandsfjorden, så kjøpte handelsmannen Gunder Abusdal opp land på båe sider av denne vegen.

Det kom straks opp hus i dette området, og då var det Albert Olsen frå Kristiansand sin tur til å kjøpa det som var att av Salbergmoen. Han sette i gong regulering av gater og tomter etter mønster frå Kvadraturen i Kristiansand, og kalla heile området opp etter seg sjølv som Albertstad. Sjølv om namnet forsvann saman med mannen, så vart dette til eit greit regulera bustadfelt lenge før kommunane hadde slike ting å stella med. Dei 5 gatene i området fekk sine namn og tomtenummer som ein har nytta fram til 2014. Etter det vart alle nummer bytta ut med nye, og gatene fekk mindre justeringar for å imøtekoma moderne krav.

Kjelder

• Reidar Tveito etter diverse muntlige kjelder på Byglandsfjord.