Svein Hovden
| Svein Hovden | ||
|---|---|---|
| ||
| Svein Hovden rundt 1890. | ||
| Født: | 18. august 1841 | |
| Død: | 1924 (alder 82–83) | |
Svein Knutsson Hovden (fødd 18. august 1841, død 1924) frå Hovden i Bykle var bonde og tradisjonsberar, sogemann, kvedar, handverkar, postopnar og mykje anna i Øvre Setesdal.
Livsveg
Svein Hovden var son av Knut Sigvaldsson (1809–1860) og Guro Sveinsdotter Tovsland (1803–1882). Faren var frå Kvammen i Åmotsdal, og kom frå ei vidgjeten kjempeætt. Mora var av Tovslandsætta i Grungedal. Dei kjøpte garden Haugardsmo i 1830. Men i 1836 bytta dei til seg Hovden Der nede, og flytta dit. Det var der Svein Knutsson vaks opp som den nest yngste i ein syskjenflokk på seks. Sjølv kalla han seg Svein K. Tveiten etter morsgarden i Grungedal. Men i Bykle er han kjend som Svein Hovden.
Han vart gift med Tone Knutsdotter Gardsteig (1850–1892), og dei fekk ti born saman. Tre av borna døydde unge. Men dei andre vaks opp. Det er ei rekkje etterkomarar etter Svein og Tone både i Noreg og USA.
Sogemann
Mest kjend er Svein Hovden truleg som sogemann. Han skreiv ikkje ned noko sjølv. Men noko av sitt rike tilfang av soger fekk han fortald til Johannes Skar. Seinare skreiv Knut Hoslemo ned mange av historiane hans. Mange av desse fekk Knut Hoslemo på trykk i Agder Tidend i tidsromet 1920-1930. Mykje av stoffet er no samla og gjeve ut av Olav M. Holen i Meir gamalt or Sætesdal I (2015).
Litteratur
- Leonhard B. Jansen og Kirsten Bråten Berg, Svein Knutsson Hovden – kvedar og sogemann (1991)
Kjelder
- Artikkelen om Svein Knutsson Hovden på lokalhistoriewiki.no, skrive av Chris Nyborg
- Artikkelen om bruket Der Nede på Hovden på lokalhistoriewiki.no Denne artikkelen er igjen basert på ein artikkel i den trykte utgåva av Heimar og folk i Bykle av Aanund Olsnes
- Olav M. Holen, Meir gamalt or Sætesdal I, utgjeve på eige forlag, 2015