Sprekleiken 2010

SPREKLEIKEN 2010. I år vert Sprekleiken sundag 3. oktober kl. 14.00. Dette var ei nyskaping som Valle IL og Valle jakt- og fiskelag skipa til i fjor. Konkurransen er inspirert av Olaf Tufte sitt arrangement på Tufte gard og ulike liknande konkurransar som Highland games i Skottland. Stokkekastinga kjem derifrå. Konkurransen går ut på å gjennomføre ei rundløype som i fjor omfatta rundballerulling, stokkekasting, sekkebering og kryping . Dette synte seg å vere ein spanande og publikumsvenleg konkurranseform. Opplegget vert om lag det same i år. Olaf Tufte var hovudpersonen i fjor og drog sjølvsagt i land sigeren. I år er det den sterke 7-kjemparen frå Kristiansand, Ida Marcussen som er hovudpersonen. Ho gjorde eit godt EM og tok og to noregsmeistarskap i fri-idrott i haust, så ho vert hard å bryne seg på både for kara og kvende. I fjor var denne konkurransen ny og ukjend. No satser me på å betre marknadsføringa og ynskjer deltakarar frå heile Setesdal og gjerne landsdelen med. Det er klassar for vaksne menn og kvinner over 16 år, juniorklasse for jenter og gutar under 16 år og lagkonkurranse. Av omsyn til planleggjing og heatoppsett, må me ha påmelding på førehand. Ein må difor melde seg på til post@valle-il.no seinast 1. oktober. Utfyllande informasjon finn ein på www.valle-il.no.

Me satsar på ein fin dag på Valle Stadion den 3. oktober.!